উলগুলান

দারায়কান 15 নভেম্বর দ হুলগৗরয়ৗ বিরসা মুন্ডাওয়াঃ জানাম মাহা। অনা দিসৗ তে–

অনলিয়া – Anal Hembram
—————-
ভারত রেয়াঃ চিতৗররে ঞেলেনা
নাহাঃ ঝাড়খঁড,
রাঁচি, সিংভুম,পালামৌ, লোহারদাগা, হাজারিবাগ।
ঞেলেনা বুরু–
তিরিলকুটি, ডোমবারি, বিচৗ,কুরুমবা,সৗলরাকাপ্।
বুরু আঞচার খন ধুঁওয়ৗ দঁগয় দঁগয়
লঃ কানা বির দিসম।
বাং, বির দিসম দ বাং
লঃ কানা আদিবাসিয়াঃ জিয়ন।
বুঁদি সেঁগেল লেকা মডঃ মডঃ
জিউয়ি সেঁগেল,
আদিবাসিয়াঃ জিউয়ি সেঁগেল।
উসকুরাদায় চালকাদ আতোরেন
জুওয়ৗন কড়া বিরসা,
জোল রাকাপ্ এনা সেঁগেল
দৗউ-দৗউ জিউয়ি সেঁগেল।
আঁগরা  হবর কাতে
কামসাও এনায় আরাঃ সাদম
সাহেব-সুবৗওয়ৗঃ কুলহি ডাহারতে।
বতরতে কেকলেসেৎ
জমিদার, মাহাজন,ঠিকৗদার ।
বিদেশি রাজাঃ সিয়ৗজারি অৗন-আরি
মেসায়েনা তরচ্ রে।

সৗলরাকাপ্ বুরু খন
আঁজমঃ কানা হেঁকাৎ
“রাজ দ আলেয়াঃ, আপেয়াঃ দ বাং
মুন্ডৗ কো দ হৗতয়ৗর বাংকো দহয়া
হৗতয়ৗর দ আপে সোপরোদ পে
আলে দ মুচৗৎ সাঁহেৎ হাবিচ্ লে
লৗড়হৗই গেয়া।”
তারকোয়েনা আড়াং–
বির-বুরু  গাডা-মুডু ডাহি-ডুংরি
নৗই-নালা খেত্-বৗদ ডি-ডিহৗত‌্ রে।
এহপ্ এনা লৗড়হৗই
ঘামাঘৗট লৗড়হৗই
সৗঁই-সৗঁই তেরাঙঃ কানা সার
সাডেকানা বাঁদুক দিড়ৗম দিড়ৗম,
লিঁগিয়েনা মায়াম।
মায়ামতে গাবাওয়েনা বুরু ঝারনা দাঃ
লহৎ এনা কড়াম ধারতি আয়োওয়াঃ।
অলেনা নাগাম উলগুলান।

রিডেৎ, রডচ্, আঁদাঃ, কচলন
সিয়ৗজারি বিরুধরে লৗড়হৗই,
বাঞচাঃ রেয়াঃ লৗড়হৗই,
বহঃ তুল কাতে বাঞচাঃ রেয়াঃ লৗড়হৗই
দিসম হাসা হাড়ুপ্ কাতে লৗড়হৗই
উলগুলান।
———০———